Ақтөбеде әлі де терроризм қаупі жоғары
Ақтөбе облысында аса маңызды 184 нысан терроризм қаупінен жеткілікті деңгейде қорғалмаған деп хабарлады облыстық ішкі істер департаментінің (ІІД) баспасөз қызметі.
Бұл туралы azattyq.org хабарлайды.
ІІД дерегінше, облыста қауіпсіздік тұрғыда осал 700-ден астам нысан (аса маңызды мемлекеттік, стратегиялық, экономика саласының объектілері және қауіпті өнеркәсіптік нысандар, адам көп жиналатын орындар) бар.
Полицияның мәліметінше,тексеруден соң 184 нысанның басшысына ескерту жасалған, 13-і әкімшілік жауапқа тартылған.
2016 жылы маусымның 5-інде Ақтөбеде белгісіз адамдар екі қару-жарақ дүкенін тонап, әскери бөлімге шабуылдаған. Ресми мәлімет бойынша, шабуыл мен атыстан 40 шақты адам жараланып, 20 адам қаза тапқан. Бұл шабуылдан кейін алты күнге созылған арнайы операция кезінде «діни радикал», «қарулы шабуылшы» деп сипатталған 18 адамның көзі жойылып, 20 шақты адам ұсталған.
Ақтөбедегі атысқа байланысты 29 адам сотқа тартылған. Оның 9-ы – түрлі қылмыстық құқық бұзушылық жасағаны, оның ішінде «терроризм актісін жасауға тікелей қатысқандары» үшін, 18-і – «дайындалып жатқан қылмыс туралы хабарламағаны» үшін, екеуі – қылмысты жасырып қалғандары үшін екі жылдан бастап өмір бойына дейінгі бас бостандығынан айыру жазасына кесілген.
Бәтес Ерболат
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе