АҚШ жеті ресейлікті бүкіл әлемге кибершабуыл жасады деп айыптады
Құрама Штаттар ресейлік әскери барлаушылардың жеті өкілі бірнеше мемлекетке кибер шабуыл жасады деп мәлімдеді.
АҚШ әділет министрлігі айыпталып отырған жеті ресейліктің аты-жөнін жариялады. Олардың бәрі Ресейдің Бас барлау басқармасының қызметкерлері делінген.
Олар – Алексей Моренец, Евгений Серебряков, Иван Ермаков, Артем Малышев, Дмитрий Бадин, Олег Сотников және Алексей Минин.
Аты-жөні аталғандардың төртеуі биыл сәуір айында Химиялық қаруға тыйым салу жөніндегі ұйымның Нидерландтағы штаб-пәтеріне кибер шабуыл жасамақ болған кезде, анықталып, елден шығарылған.
Мәлімдемеде ресейліктер Халықаралық антидопингтік агенттік базасына, Пенсильваниядағы атом электр станциясына да шабуыл жасамақ болды делінген.
Бейсенбі күні Ұлыбритания, Нидерланд, Канада елдері де Ресейдің барлау қызметін айыптаған.
Нидерланд және Ұлыбритания премьер-министрлері Марк Рютте мен Тереза Мэй ресейлік әскери барлау қызметі ғаламдық қауіпсіздікті қамтамасыз ететін келісімді сыйламай отыр деп мәлімдеген.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе