Оңтүстік Қазақстан облысының мамандандырылған ауданаралық қылмыстық сотында Сайрам ауданы Қарабұлақ кентінің 33-жастағы тұрғынына қатысты іс қаралды.
Ауыл тұрғыны әйелін қатыгездікпен өлтіріліп, қылмысын жасыруға тырысқаны үшін 11 жылға бас бостандығынан айырылды. Бұл туралы ҚазАқпарат хабарлады.
Сот төрағасы Дәурен Мадалиевтың айтуынша, айыпталушы ҚР ҚК-нің 99-бабы 1-бөлігінің «Адам өлтіру» бойынша сотталған. Сондай-ақ, ол жазасын қауіпсіздігі барынша жоғары түзеу мекемесінде өтейтін болды.
Бірақ, марқұмның туыстары мұндай қортындымен келіспей, облыстық ІІД мен «Сана сезім» әйелдердің құқын қорғау орталығына барып шағымданған. Осыдан кейін араға айлар салып, қылмыстық іс қайта қозғалды.
Қайтыс болған әйелдің мүрдесі қазылып алынып, сот сараптамасы жүргізілді. Нәтижесінде, келіншектің ауыр соққыдан қабырғаларының сынғаны және бірнеше жерден жарақат алғандығы анықталды. Ал, оның күйеуі адам өлтірген деп айыпталып, қамауға алынған еді. Тергеу барысында күдіктінің қылмысы дәлелденіп, сотқа өткен болатын. Айта кетерлігі, марқұмның артында екі баласы қалды.