“Әй, жарайсың!”. Димаштың Лондондағы концертінің билеттері бір демде сатылып кетті

«Билет сататын қазақ сайты ашылмай тұр… Шынымен істен шыққаны ма?», «Иә, билет сатып алу мүмкін емес. Орын жоқ деп жазып жатыр», – деп шағымданды желі қолданушылары әлеуметтік желілерде.

Бір жарым сағаттан соң жергілікті biletiastana.kz сайтында төменгі және жоғарғы қабаттардағы блоктарға 33-36 мың теңгеден (Ұлттық банктің бағамы бойынша 90-100 доллар шамасында) билет алуға мүмкіндік пайда болды.

Астана уақыты бойынша сағат 17.30-да ағылшын тіліндегі AXS ресурсында Димаш шоуында отыратын орындарға бір де бір билет болған жоқ. Алайда концертті тұрып тыңдауға болатын фан-аймақтан орын таба аласыз.

Димаштың концерті өтетін орын – Indigo at the O2 залы. Сайтта ойын-сауық орталығына 2800 көрермен сиятыны көрсетілген.

Сонымен қатар, кейбіреулер сатып алынған билеттерді қазірдің өзінде қайта сата бастады, желіде концертке барғысы келетіндерді іздеп жатыр.

Димаш Тұманды Альбионда 19 қараша күні алғаш рет өнер көрсетеді. Тіркелген көрермендерге жеке RSVP бейдж беріледі.