Өзбектің эстрадалық әншісі Озода Саидзода (Нурсаидова) осыдан екі жыл бұрын Шавкат Мирзиёевті сотқа бермекші болған еді.
Енді сол Шавкат елдің президенті болып кетті. Содан болар, әнші Озода өзінің Инстаграмдағы парақшасында екі жыл бұрын қателік жасағанын мойындап, президенттен кешірім сұрады, деп жазады eltuz.com сайты.
«Уақыт өте бәрі өз орнына келеді екен. Кезінде біреулер менің қолыммен Шавкат Миромоновичтің көзін құртпақ болған», деп жазды ол.
Айта кетсек, екі жыл бұрын әнші «Озодлик» радиосына берген сұхбатында сол кездегі премьер-министр Шавкат Мирзиёевті сотқа беретінін айтқан еді. «Менің сахнаға шығуыма, мені 2006 жылдан бері радиоға шығарып, телевизиядан көрсетуге салынған тыйымға Шавкат Мирзиёевтің тікелей қатысы бар. Мирзиеев заңсыз әрекеттерге барған, оның билікке қандай жолмен келгені маған белгілі, ол өзін қолдайтын әртістердің көмегімен маған қысым жасауда», деген еді ол.