Әбілязов ақшаны қалай жеген?

“2006 жылдың 7 желтоқсанында Toros LTD Jennifer Rene компаниясының директоры “Банк Тұран Әлем” АҚ-дан 144 миллион АҚШ доллары сомасында қаржыландыруға өтініш берген. (…) 2008 жылдың 29 сәуірінде қарызды Rockway Holding Starwood компаниясының атына ауыстыруға келісімшарт жасалған. Нәтижесінде 2012 жылы бұл келісімшарт жарамсыз деп танылды”, – деді жәбірленуші тараптың өкілі Талғат Амантай. 

Сондай-ақ, жәбірленуші тараптың өкілі іс қарауындағы барлық компанияның Лондонның Жоғарғы сотының бұйрығымен Мұхтар Әбілязовтің активі деп танылған. Айта кетейік, лондондық сот қорытынды бенефициары Әбілязов болып танылған шамамен осындай 1000 компанияны анықтаған.

  Офшор компанияларға кредит берумен айналысқан №6 корпоратив бизнес басқармасына жетекшілік еткен Садықов осы қарастырылып отырған эпизодтар бойынша тағылған айыптармен келіспеді. Ал кредит беру туралы барлық құжатта қолы қойылған тағы бір сотталушы Жарымбетов кінәсін мойындап отыр. 

“Жер учаскелерін сатып алу – Әбілязовтің бөлек бір жобасы. Ол барлығын бекітті. Ол осы жобаның акционері әрі алушысы болды”, – деп мәлімдеді Жарымбетов. 

Мұхтар Әбілязовтің қылмыстық ісінде 160-тан аса эпизод бар, осының барлығы 2 мың томнан асады. Осыған дейінгі сот отырыстарында БТА банкінің экс-басшысы басқарған “Астана-Холдинг” компаниясының қызметкері өзін Әбілязовтің сыбайластары шекарадан асырып әкетуге әрекеттенгенін мәлімдеген.

Тағы бір сот тыңдауында есепті банктің қаражаттарына “БТА Банкінің” экс-басшысы Мұхтар Әбілязовтің жеке әуепарк сатып алғаны хабарланған. Банкте кепілдік ретінде “люкс” санатындағы бірнеше ұшақ болған, бұл ұшақтар бірнеше жыл бойы бұрынғы басшылық пен олардың туыстарын тасымалдаған делінеді. Ал бұл ұшақтарды күтуге 2008 жылы банк ай сайын 100 миллион теңгеден аса (675 мың доллар) қаражат жұмсап отырыпты. 

Айта кетейік, Әбілязовтің өзі сотқа қатысып жатқан жоқ, оның мүддесін мемлекет тағайындаған адвокат қорғап отыр. Сотталушы ретінде БТА банкінің бұрынғы топ-менеджерлері қарастырылып отыр. Олар – басқарма төрағасы Сәдуақас Мәмеш, басқарма төрағасының бірінші орынбасары – кредит комитетінің төрағасы Жақсылық Жарымбетов, кредиттеу бойынша директор Қайрат Садықов. Мәмеш пен Садықов сотта өз кінәсін ішінара мойындаса, Жарымбетов толықтай мойындап отыр.  Еске салайық, Әбілязов қылмыстық топ құрды және оған басшылық етті, БТА банкінің қаражатын жымқырды және оларды заңдастырды, банк қаражатын заңсыз қолданды және өкілеттігін теріс пайдаланды деп айыпталып жатыр.