Ақтөбеде жеті ай бұрын дәретханадан табылған сәбиді біреулер асырап алды. Бірақ жетімдер үйінің қызметкерлері оның қандай отбасыға берілгенін айтпай отыр. Тек ата-анасын қыздың аты-жөнін дереу ауыстырып алғаны белгілі болды.
Бұл туралы КТК арнасы хабарлады.
Мамыр айында болған бұл оқиға жұрттың жағасын ұстатқан еді. Жаңа туған шақалақты безбүйрек анасы қала шетіндегі дәретхана шұңқырына лақтырып кеткен. Нәресте сол маңдағы тұрғынның арқасында аман қалды. Бөбектің іңгәлаған дауысын естіген Молдағали Орынбасар жедел жәрдем мен тәртіп сақшыларын шақыртқан. Кейін дәретхана тесігінен табылған қыздың аты-жөнін дәрігерлер Мәншүк Мәметова деп жазды. Жарты жыл бойы полицейлер көкек ананы іздегенімен, онысынан түк шықпаған. Ең бастысы тастанды сәби жаңа отбасын тауыпты. Мамандар олардың қазір Ақтөбеде тұрып жатқанын ғана айтты.
– Сәбидің жаңа отбасы бізде 2012 жылдан бері бала асырап алуға кезекте тұрған еді. Олар – 45-48 жастағы жергілікті тұрғындар. Өзге мәліметтерді құпия болғандықтан айта алмаймыз.