Ұлттық компаниялар мен мемлекеттің иелігіндегі xолдингтер жаңажылдық корпоративтерден бас тартуда.
Бұл туралы “ҚазАқпарат” тілшісімен болған әңгімеде Orda FM арнасындағы “Лига Джентльменов” шоуының радиожүргізушісі, танымал шоумен, “1show.kz” event компаниясының резиденті Азамат Имашев мәлім етті. Оның айтуынша, қазір мемлекет үшін қиын тұста, отандық компаниялар жаңажылдық сауық-сайранға емес, еліміздің егемендігіне 25 жыл толуына арналған түрлі шараларға көп мән беруде.
Дегенмен олардың өзі дағдарыс кезінде көп шығынға батпай-ақ, мейрамды арзанға өткізуге тырысады екен. “Жаңа жылдық корпоративті өткізу шамамен 300 мың теңгеден басталады. Қазір әртістері шақыру да азайды. Бұрынғыдай мейрамды белгілі бір тақырыпқа арнап, Голливуд мәнерінде ұйымдастыру өзекті емес. Биыл желтоқсанға әртіс жалдаған компаниялар мүлдем жоқ. Әр компанияда өздерінің таланттары бар. Бөлім қызметкерлері жеке-жеке сценарий дайындап, бірі ән айтса, екіншісі музыкалық аспаптарда ойнайды, енді келесілері күлкілі қойылым ұйымдастырады”, – деп түйді сөзін Азамат Имашев.
Кей кездері ұжым Аяз Ата мен Ақшақарды шақыртудың орнына, бөлім бастығын Аяз Ата, ал оның көмекшісін Ақшақар қылып киіндіріп шығаруды жөн көреді екен. Бұл компания қаражатын үнемдеп қана қоймай, әріптестердің көңілін көтереді.