Қазақстандық әнші «Славян базары» халықаралық байқауында топ жарды

Қазақстандық өнерпаз Алмагүл Батталиева Беларусьтің Витебск қаласында өткен XXXIV Халықаралық эстрада әншілері конкурсында Гран-при иегері атанып, қазақ ән өнерінің абыройын тағы бір мәрте асқақтатты. Бұл байқау жыл сайын өтетін «Славян базары» халықаралық өнер фестивалі аясында ұйымдастырылады.

Марапаттан кейін Алмагүл өз қуанышын жасырмай, әсерімен бөлісті.

«Жеңіске жеткеніме әлі де сене алар емеспін. Бұл – мен үшін үлкен мәртебе. Қазақстанға осы мүсіншені алып кету мүмкіндігі бұйырғанына қуаныштымын. Бұл жолға сегіз жыл уақытым кетті, бірнеше рет ұлттық іріктеулерден өттім. Бізде талантты әншілер өте көп, бәсеке жоғары. Қазақ халқы әнді жан-тәнімен сүйеді – біздің әншілер сахнадан ешқашан құр қайтпайды. Бұл – зор жауапкершілік», – деді ол.

Әнші байқаудың атмосферасы мен көрермендердің қолдауын да ерекше атап өтті.

«Беларусь көрермені өте белсенді екен. Залға адам сыймайды, жұрт орнынан тұрып қол шапалақтайды. Осындай қолдау шабыт береді. Ұйымдастыру деңгейі де жоғары – бұл шынымен халықаралық дәрежедегі өнер мерекесі», – деді Алмагүл Батталиева.

Фестивальге келген қонақтар мен қатысушыларды көрермендер де, ұйымдастырушылар да жылы қарсы алды. Алмагүл бұл дода өзіне үлкен шығармашылық серпін бергенін айтты.