Президент шахматтан Олимпиадада күміс медаль алған әйелдер құрамасын құттықтады

Мажарстан астанасы Будапешт қаласында шахматтан 45-ші Олимпиада ойындары аяқталды. Қазақстан қыздар құрамасы күміс жүлдеге ие болды. Соңғы ойында жерлестеріміз АҚШ құрамасымен жолықты. Бұл кездесу тең аяқталды. Сөйтіп 11 турда 18 ұпай жинаған Қазақстанға екінші орын бұйырды. Мемлекет басшысы Қасым-Жомарт Тоқаев шахматтан әйелдер құрамасын құттықтады.

«2024 жылғы Дүниежүзілік шахмат олимпиадасында күміс медаль жеңіп алған Қазақстанның әйелдер құрамасын құттықтаймын. Бұл – қазақ шахмат мектебі мен шахматшы қыздарымыздың тамаша жетістігі. Спортшыларымыз биік белестерді бағындыра берсін!», – деп жазды Мемлекет басшысы өзінің Х әлеуметтік парақшасында.

Айта кетейік, Дүниежүзілік шахмат олимпиадасында Қазақстанның әйелдер құрамасы күміс медаль еншіледі. Алтынды Үндістан құрамасы алды. Үндістан әйелдер құрамасы 19 ұпай жинап, Қазақстаннан бір ұпайға озып кетті.