Қазақ тілінің қадір-қасиетін қазақша сөйлейтін қазақтар ғана кетіріп жатыр – Жанар Байсеміз

«Шетелдегі қазақ балалары» жобасының авторы әрі жүргізушісі Жанар Байсеміз қазақ тілінің қазіргі жағдайына алаңдаушылық білдірді.

Бұл туралы тележүргізуші Instagram-дағы stories бөлімінде жазды.

«Блогерлер, коучтар, тағы басқалары «больым» деп көп айтып жүр. Менің больым дейді. Боль деген сөзді жан жарасы деп алсақ қалай болады? Жан жарасы — қандай әдемі сөз. Қазақ тілінің қадір-қасиетін қазақша сөйлейтін қазақтар ғана кетіріп жатыр. Кезінде ауылдан шыққан қазақтар, тілі қазақша шыққан қазақтар. Мектепте, университетте қазақша оқыған қазақтар. Екі сөздің біріне орысша сөз қосу — сән емес. Бұл — сорақылық, бұл надандық. Бұл — мәдениеттің төмендігі. Ойыңды орысша жеткізгің келсе, таза орысша сөйле. Қазақша айтқың келсе, таза қазақша айт. Құдай үшін, тіл тазалығын сақтайықшы», — деп жазды журналист.