«Сайқымазаққа ұқсайды». Дулат Исабеков «Туканың» әзілдерін сынап, шығармашылыққа қылмыс жасап жүр деп санайды

Жазушы Дулат Исабеков әзіл әлемінде жүрген өнер адамдарын сынап, күлкінің құнын түсірді деп айыптады. Күлтөбе подкастында әдебиет өкілі әзіл-ысқақ театрларының бағыт-бағдарын айтып берді.

«Менің шығармаларымнан үзінді алып, сахналап жүргендерін тек теледидардан ғана көремін. Менен ешкім рұқсат алып жүрген жоқ. «Шаншар» театрының қойғанын да көрдім. Мән мен мағына жоқ. Хабарласып, «Сотқа беремін» деп ашуландым. Менің шығармамды құнсыздандырып тастапты. «Тука» деген образы бар актер алқаштың рөлін сомдаған. Сайқымазаққа ұқсайды. Одан кейін Мәмбетов театрында қойылды. Оны да теледидардан көрдім. Астына менің атымды жазып қойыпты. Оларға да ренжідім. Содан кейін олар басқаша қоя бастады. Адам не күлмейді, не ойланбайды. Сайқымазақ қабілеттерімен театр ашып жүр. «Әпкені» де қойып жүр екен. Спектакльдерін қабылдай алмадым. Мәтінді толықтырып, кеңінен тоқталу керек еді. Бұл шығармашылыққа жасалған қылмыс деуге келеді», – дейді жазушы. 

Драматург шындықты айтқаны үшін талай таяқ жегенін де айтып берді. Оның айтуынша, күлдіремін деп бүлдіретін көп. Мұхтар Әуезов: «Күлкі деген шынайы болуы керек» дегенді айтып кеткен. Өнердің жанрын түсінбей жұмысқа кіріспеу керек деп тұжырады.

«Спектакльдің жанрын толық түсіне алмай, қалай драматург боласың. Міне, осының бәрін айтсам, ренжіп қалады. Қазіргі театрлар қоғамдағы шындықты әзілмен жеткіземіз деп, бағытынан айырылып қалып жатыр. Күлкі болып жүргендері қаншама?! Шындықты айтсам, халыққа жағамын, билікке жақпаймын деп мақала да жазған едім. Бұл енді мәдениет пен өнердің айналасындағы мәселелер. Назарбаевқа шындықты айтқаным үшін, кабинетінде талай дауласқанбыз. Араласпай кеткен кезіміз де болған. Кейін татуластық», – дейді драматург.