Атыраулық кәсіпкер өндірген тауарларын мұқтаж жандарға тегін таратты

Атыраулық кәсіпкер «Аман-Есен» шаруа қожалығының жетекшісі Мұрат Исағалиев тұрмысы төмен отбасылар, жалғызбасты қарттар мен мүмкіндігі шектеулі жандарға 2,5 тонна қарбызды тегін таратты, деп хабарлайды ҚазАқпарат.

Жылыой ауданында жұмыспен қамту, әлеуметтік бағдарламалар және азаматтық хал актілерін тіркеу бөлімінде қайырымдылық шарасы өтті.

«Егін шаруашылығымен айналысатын кәсіпкер Мұрат Исағалиев біздің бөлім өткізетін қайырымдылық шараларына жиі атсалысып отырады. Жыл сайын өзінің бақшасында өсірген өнімдерінің бір бөлігін аудан тұрғындарына тегін таратып беруді дәстүрге айналдырған. Бақша өнімдерін сатып алуға кейбір отбасылардың қаржылық жағдайы келмей жататыны жасырын емес. Бизнестің әлеуметтік жауапкершілігін жіті ұғына білетін осындай азаматтарымыз көбейе берсін. Олардың істері басқа да кәсіпкерлерге үлгі болсын», дейді бөлім басшысы Серік Қамидолла.