Мемлекеттік қызмет істері және сыбайлас жемқорлыққа қарсы іс-қимыл агенттігі 2017 жылы атқарылған жұмысты қорытындылады, деп хабарлайды Sputnik Қазақстан тілшісі.
Алқа мәжілісінде агенттік төрағасы мемлекеттік қызметкерлердің құқықтары мен мүдделері тиісті деңгейде қорғалмай жүргеніне тоқталды. Айтуынша, жазалау мен ынталандыру арасындағы тепе-теңдікті сақтау бойынша шектен шығу фактілері ұшырасады.
– Біздің әріптестеріміз БАҚ пен жұртшылықтың, тексерушілер мен тікелей өз басшылығының қысымына ұшырап жатады. Командамен ауысуды қысқарту бойынша елеулі оң өзгерістерге қарамастан,
жекелеген басшылар әлі де өз адамдарын ертіп кетуді жалғастыруда.
Бұл бірден жасалмайды, алайда бір жыл ішінде басқарушы құрамның толығымен ауысқанын байқайсың. Осыған байланысты мынаны айтқым келеді: егер мемлекеттік қызметкер ашық конкурс аясында қабылданса, онда ол өзіне жасалған қысымға шыдамай, лауазымын төмендетуге немесе өз еркімен жұмыстан кетуге көнбеуі тиіс. Менің ойымша, мұндай қадамға біліксіз немесе бір нәрсе бүлдірген қызметкерлер барады”, — деді Шпекбаев.
Ол агенттік мемлекеттік аппараттың тұрақтылығы мен мемлекеттік қызметкерлерді қорғауға ерекше ден қоятынын атап өтті. Оның айтуынша, қызметкерлердің әдеп ережелерін сақтау мәселесі де ведомствоның жіті бақылауында.
– Әдеп ережелерін бұзған қызметкер қатаң жазаланады, тіпті, жұмысынан шығарылуы мүмкін. Мемлекеттік қызметте көргенсіздік пен дөрекілікке жол бермес үшін бәріміз бірігіп әрекет етуіміз керек. Бұл біздің қолымыздан келеді…
Мемлекеттік қызметкерлерде азаматтарға қатысты дұрыс, сыпайы қарым-қатынас, мәдениет болу керек,
деп ойлаймын, — деді Агенттік басшысы.