Астана халқының саны 1 миллион 26 мың 181 адамға жетті

2018 жылы Қазақстан Республикасының елордасы – Астана қаласының 20 жылдығы. Осы 20 жыл аралығында бас қаламыз дамып, көркейіп, халқымыздың мақтанышына айналды.

Астана қаласы әлемге танылған қалалардың қатарынан ойып тұрып орын алды. Сонымен қатар шаһар халқынын да саны арта бастады деп хабарлады Астана қаласы әкімдігінің баспасөз қызметі.

Мысалы 2017 жылдың басында қаламызда халық саны 972 693 болса, осы жылдың 1 қарашадағы мәлімет бойынша 1 026 181 адам. Осы аралықта халық өсімі 53 489 адамды құраған. Ал Астана қаласындағы үш ауданның ішінде ең халқы көп аудан Алматы ауданы – 431 377 адамды құрап отыр.

2017 жылдың 1 қарашасында Астана қаласы халқының саны 1 026 181 адамды құраған.

2016 жылдың сәйкес кезенімен салыстырғанда халық саны 76 178 адамға (8%) өскен. Сәйкесінше Астана қаласы тұрғындарының туу көрсеткіші 2013-2016 жылдар аралығында қарқынды өсім динамикасын көрсетіп, бірақ 2017 жылдың қазан айындағы мәліметке сай, туу көрсеткіші 23 668 сәбиді құрап, 2014 жылғы көрсеткішпен теңескен.