Алматы облысында төрт баласын тастап кеткен безбүйрек ана табылды

“Үйдің иесін шақырттық. Сол кісілердің айтуынша, бұл үйді әйелдің өзі емес, бірге тұратын Қадыржан деген кісі жалдаған екен. Ол кісінің туу туралы куәлігі ғана бар екен. Анасы 91-ші жылғы. Дүйісбаева Ботагөз аты-жөні. Жеке куәлігін таппадық. Сондай-ақ, балалардың да туу туралы куәлігін таппадық”, – дейді Еңбекшіқазақ аудандық білім бөлімінің қызметкері Алмагүл Дүйсебаева.

Балаларын қараусыз қалдырған ана бір апта бұрын Шелек ауылынан көшіп келген екен. Көршілері, олардың бойынан ешқандай оғаш қылық байқамағынын айтады. Ал, суық үйде бүрсең қағып, аштықтан қалжыраған балалар аудандық ауруханаға жеткізілді.

“Кеше төрт баланы алып келді. Үш қыз, бір ұл бала. Түрлерінен-ақ қараусыз қалғаны көрініп тұр. Барлық тексеурден өткіздік. Жағдайлары жақсы”, – дейді Еңбекшіқазақ аудандық орталық аурахана директорының орынбасары Гүлнар Құраметова.

Аяғынан тік тұрған тәртіп сақшылары 26 жастағы безбүйрек ананы тауып, аудандық ішкі істер бөліміне алып келді. Оның айтуынша, Шелек ауылына сапарлап кетіп, ақшасының жоқтығынан кері жете алмаған көрінеді. Бірақ, балаларын не үшін тастап кеткенін түсіндірмей, күмілжи беріпті. Қазір аудандық қамқоршы орган өкілдері, балаларды қараусыз қалдырған әйелді ата-аналық құқығынан айыру мәселесін қарап жатыр.