Шахан трагедиясы: Қаза тапқандардың отбасы тағы да миллион теңгеден алды
“Шахтинск қаласы, Шахан ауылындағы төтенше жағдайдан зардап шеккендерге көмектесу қоры” жылу қазандығы жарылуы салдарынан қаза тапқан тоғыз адамның отбасына бір миллион теңгеден бөлді. Бұл туралы ҚазАқпарат хабарлайды.
“Қайғылы оқиға болған кезде қор тоғыз отбасыға 500 мың теңгеден берген. Кейін марқұмдардың жылдық асын атқару үшін тағы жарты миллион теңге берілді. Ол уақыттың 2018 жылдың қаңтар айына тура келетініне қарамастан, біз оны ертерек берейік деп шештік”, – дейді қордың қамқорлық кеңесінің басшысы Жамал Мамерханова.
“Осылайша ол отбасылар трагедиядан соң ас беру, ескерткіш тақта орнату, несиелерін өтеу шығындарын есептемегенде 2 миллион 500 мың теңге алды. Олардың отбасы жаңа пәтерлерге көшірілді, көшкісі келмегендерге өтемақы ақшалай берілді. Ол ақшаға Шаханнан емес, басқа қалалардан да ең жақсы үйді алуға болады”, – дейді Мамерханова.
Ал зардап шеккен 11 жастағы Елена Васильева мен 32 жастағы Александр Галышевке қайтара көмек көрсетілмеген.
“Өйткені олар ем курсын алып, ауруханадан шығарылды. Олар оған дейін 500 мың теңге алып қойған. Бірақ, ақша алсам деген өтініштері қанағаттандырылады. Мәселен, Еленаның туыстары қызға косметикалық операция жасатамыз деп ақша сұрады. Қанша сұрады, соны бердік”, – дейді қамқорлық кеңесінің басшысы.
Қазір қордың есепшотында 7 миллион 8 214 теңге қалған. Қазақстандық жеке және заңды тұлғалардан жалпы саны 203 миллион 851 192 теңге келіп түскен екен. Апатты қалпына келтіру жұмыстарына 196 842 977 теңге жұмсалған. Қалған қаражат қаза тапқандардың жерлеу рәсімдеріне, екі зардап шегушінің еміне, жарылыс зардаптарын жоюға, шұңқырларды қалпына келтіруге, жаңа қазандық орнатуға және бес қабатты үй жанынан қосымша құрылыс бөлімін тұрғызуға кеткен.
Ал қалған 7 миллион теңге енді зардап шеккен жеті пәтерді жөндеу жұмыстарына жұмсалады.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе