Сейсенбі күні АҚШ президенті Дональд Трамптың әкімшілігі Ресейге жіберетін жаңа елшіні таныстырды.
Юта штатының бұрынғы губернаторы, республикашыл Джон Хантсман Ресейге елші ретінде наурыз айында таңдалып қойған. Бірақ Ақ үй алдымен Кремльдің мақұлдауын күтіп, оны Сенатқа бекіттіруге асықпады. Кремльдің Хантсманды және Вашингтонның Ресейдің жаңа елшісі Анатолий Антоновты өзара мақұлдауы дүйсенбі күні орын алған деп хабарлайды The Washington Post сенімді дереккөзіне сілтеме жасап.
Хантсман осыған дейін АҚШ-тың Сингапурдегі және Қытайдағы елшісі болған. 2012 жылы ол президенттік сайлауға түскен.
Хантсман қытай тілінде жақсы сөйлейді. Отбасындағы жеті баланың бірі – асырап алған қытай қызы. Хантсман отбасы ірі химиялық кәсіпорынды басқарады. Ол осы бизнесін Ресейде дамыту үшін кәсіпкер ретінде Мәскеуге барған.