Жаз айы, аптап ыстық болған соң қазақстандықтар көрші елдегі Ыстық көлге түсіп, бір сергіп қайту үшін жаппай көліктеріне мініп жатыр.
Алайда демаламын дегендердің бір күнінің тең жартысынан көбісі шекарада өтіп, елдің көңіл-күйі бұзылған. Бұл туралы Миргүл Өмірзақова есімді Facebook қолданушысы жазды.
Алматылықтың айтуынша, 6 шілде күні “Қарқыра” бақылау-өткізу пунктінде жүздеген автокөлік кептелісте қалып қойыпты.
“Алғаш рет осындай жайт болып отыр! Шекарашылар жетпей қалды. Қазақстандық тарап әдеттегідей әр көлікті жіті бақылады, негізінде балалы-шағалы отбасы Ыстықкөлге кетіп бара жатқаны көрініп тұр ғой. Қырғыздар жағы тез өткізеді”, — деп атап өтті жазба авторы.
Алматы тұрғынының сөзіне жүгінсек,
ол отбасымен таңғы сағат 10.00 уақытында өткізу пунктіне келеді, олар 84-ші болып кезекке тұрыпты, түстен кейін сағат 16.00 шамасында ғана шекарадан өткен.
“Менен кейін 120 көлік бар болатын! Балаларым шыдамай кетті, тамақ та алып шықпағанмын. Бір сағаттық жолға не керек деп едім. Қаракөлдегі туыстарыма хабарласып, олар балаларды алып кетті. Мен кезекті ұзақ күттім”, — дейді наразы қазақстандық.
Жазбаның астындағы пікірлерде Қырғызстан тұрғындары алматылық әйелдің сөзін растап, қазақстандық тараптың көліктерді ұзақ ұстайтынын айтты. Кейбіреулердің айтуынша, тіпті велосипед мінгендер де үш сағат уақытын бекетте жоғалтқан, өйткені шекарашылар жүкті мұқият тексереді.