“Георгий лентасы ма?..”. Министр Абаев даулы лентаға қатысты пікірін ашық айтты
ҚР Ақпарат және коммуникациялар министрі Дәурен Абаев Жеңіс күні таратылатын екі лентаға қатысты пікірін білдірді.
Айта кетелік, Қазақстан Жеңіс күнін тойлауда георгий лентасына балама өзіндік көк жолақты лента шығарған болатын. Қос лентаның болуы қоғамда кейбір түсінбеушіліктер туғызып, адамдардың көзқарасы екіге жарылуда.
Министр бүгінгі қазақстандыққа көгілдір лента жақынырақ деп есептейді,
алайда ол қандай түсті жолақты лентаны тағатынын бізде әркім өзі шешетінін айтты.
“Азаматтарымыздың 99 проценті 9 мамыр – Жеңіс Күні деп біледі. Осы мерекені барлығымыз жақсы көреміз әрі құрметтейміз. Бұл, біз үшін ең бастысы. Қалғаны, меніңше, саясаттан шығып отыр. Басты идеология осы мерекені жақсы көріп, есте сақтауымызда және жыл сайын атап өтетінімізде. Біздің елдің бұл мерекені тойлаудағы позициясы осы. Басқа ештеңе жоқ. Жыл сайын Мемлекет басшысы Мәңгілік алауға гүл қойып, ардагерлерді құттықтайды”, – деді министр “Хабар” арнасындағы “Открытый диалог” жобасының аясында.
“Бұл жағдайда біз кімнің не істеуі керек екенін айтпауымыз керек. Адамдар бірінші кезекте оны естелік ретінде тағуы тиіс (лентаны – Авт.). Жас буын көгілдір лентаны жақын қабылдайтыны белгілі, себебі мұның біздің елдің тәуелсіздігіне қатысы бар”, – деп атап өтті ол.
Министр Георгий жолағының 1941-1945 жылдары емес, 2000-жылдардың басында ғана Ұлы Отан соғысы символы болғанын еске салды.
“Бұл мәселені саясиландырудың қажеті жоқ. Ең бастысы – ата-бабаларымызға деген қарым-қатынасымызды, оларға деген махаббатымыз бен құрметімізді сақтау”, – деп мәлімдеді министр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе