1-сыныпта оқытылатын Сауат ашу пәнiнiң атауы «Ана тiлi» деп өзгертіледі.
Бұл туралы ҚР БҒМ Мектепке дейiнгi және орта бiлiм департаментiнiң директоры Жаңыл Жонтаева Орталық коммуникациялар орталығында өткен брифинг барысында айтты, деп хабарлайды Baq.kz.
«Әлiппеге келетін болсақ, педагогтар қауымымен келiсе отырып, оны «нөлiншi» сыныпта оқыту туралы 2016 жылы шешiм қабылдадық.
Қазiргi уақытта мектепке баратын балалар әрiп танып, оқи алады. Сондықтан, осындай шешiмге келдiк. Бiрiншi сыныптарда Сауат ашу пәнiнiң орнына «Ана тiлi» пәнi оқытылады», – дедi ҚР БҒМ вице-министрi Эльмира Суханбердиева.
Ал ҚР Білім және ғылым министрлігі мектепке дейiнгi және орта бiлiм департаментiнiң директоры Жаңыл Жонтаева Сауат ашу пәнi атауының «Ана тiлi» деп өзгеретiнiн жеткiздi.
«Сауат ашу пәнiн «Ана тiлi» деп атау туралы көптеген ұсыныс келiп түстi. Бiз оны қабылдадық. Ендi Сауат ашу атауы «Ана тiлi» болып өзгертiледi», – деп түсіндірдi Жаңыл Жонтаева.