Астанадағы келіссөздердің қорытындысы Иран, Ресей және Түркияның қатысуымен Сириядағы уақытша бітім жөніндегі үшжақты жедел мониторинг тобын құру болды.
Бұл туралы Вести.ру сайтына сілтеме жасап, ҚазАқпарат хабарлады.
РФ Сыртқы істер министрлігі Таяу Шығыс және Солтүстік Африка департаментінің директоры, Астана келіссөздеріндегі РФ делегациясының басшысы Сергей Вершинин топ тұрақты негізде жұмыс істейтіндігін, ал оның қызметі жанжалға қатысушы тараптардың соғыс қимылдарын тоқтату режімін сақтауына бағытталатындығын атап өткен. Сонымен қатар бір-біріне деген сенім шараларын құру да осы топтың назарында болады.
Бұл жайында Ресейдің Жаңалықтар агенттігіне Ресей Бас штабы Бас басқармасы бастығының орынбасары Сергей Афанасьев мәлім еткен. Генерал-майордың атап өтуінше, бұл шаралар Сириядағы сенімді нығайта түсуге қызмет ететін болады.