Шымкент әкімі: «Бұл өмірде ешкім періште емес»
Шымкент қаласының әкімі Ғабидолла Әбдірахымов халық алдында есеп берді:
– Құрметті халайық! Газеттерде, әлеуметтік желілерде көтеріліп жатқан критикалармен, сын-ескертпелерден жақсы таныспын, жекелеген бөлімдер жұмысында қызметкерлер тарапынан кемшіліктер бар екені рас. Бірақ олар бойынша тиісті жұмыстар жүріп жатыр. Бұл өмірде ешкім періште емес, сондықтан жұмыс барда қателіктер де болады, деп аяқталды әкімнің баяндамасы.
Арыздарын айтуға бекінген бірнеше азаматты қаптаған шенеуніктер тоқтатты.
Олардың уәждерін өздері шешетіндерін уәде етіп, шағымдарын жазбаша түрде жинап жатты. Енді біреулері шенеуніктердің жиын барысында уәдені үйіп-төккенін көріп, райларынан қайтып, микрофон алдында әкімдерге алғыстарын жаудырды.
Жиын барысында қауіпсіздік шарасы да қатаң болды. Әкімдіктегілер рация мен байланыс құралдарымен қаруланған. Ақ жағалылар жиналған жұрттың әр қадамын бақылаумен әлек болды.
Әкімдердің алдына алдын-ала дайындалып келген өңірдің белді азаматтары Елбасы мен партиядан бастап, оңтүстік басшыларына бақытты күндері үшін, келер болашағы үшін мың алғыстарын жаудырды.
Жаттанды алғыс аздай, жиынға келгендердің үйлеріндегі келіншектеріне сәлем айтып, алдағы 8-наурыз әйелдер күнімен құттықтап, жұртты күлкіге қарық қылған біреу де болды.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе