“Сауатты болыңыздар!” Әлеуметтік желіні қолданушы діни ақпараттың қатесін дәлелдеді

Құраннан сабақ берген ұстаз қайтыс болып, оның қабірін қазғанда іші нұрға бөленді деген ақпаратқа сенудің қажеті жоқ.

Айта кетелік, бүгін әлеуметтік желіні қолданушылар Индонезияда өмір бойы Құраннан сабақ берген ұстаз қайтыс болып, оны көму кезінде қабірі нұрға бөленгендігі туралы ақпаратты көптеп бөлісіп жатыр. Мұны әлеуметтік желіні қолданушы азамат Нұрлан Жанай дәлелді түрде жоққа шығарды.

“Мен бірден өтірік дедім, себебі фактчекинг жасамай-ақ, ондай фантастикаға сенбейтін адаммын. Images.google.com сайтына кіріп, жоғарыдағы фотоны салсам, қайтыс болған кісінің туысы қате ақпарат деп мәлімдеме берген мынадай малайзиялық мақала шыға келді. Оны орысшаға аударған Google Translator-дың скриншотын да салдым. Оқыған-тоқыған ағайындар, ақпараттық иммунитетімізді нығайтайық. Әлемде көптеген соғыстар осыған ұқсас сауатсыздық пен жалған ақпараттың көптеп таралуынан болып жатыр. Сауатты болыңыздар!” деп жазды Фейсбуктегі жеке парақшасында Нұрлан Жанай есімді азамат.