Қарағандыдағы “Саран” шахтасында қаза тапқан жұмысшылардың отбасына 10 жылдық жалақы беріледі. Сондай-ақ, оларға қосымша көмек көрсетілетін болады.
Бұл туралы ҚР инвестициялар және даму министрі Жеңіс Қасымбек айтты, – деп хабарлайды Tengrinews.kz.
“Келісімге сәйкес, көмір департаментінің өкілдері мен комбинаттағылар қажетті көмекті көрсетіп жатыр. Мен қаза тапқандардың отбасына шамамен он жылдық жалақаның берілетінін білемін, онымен қоса оларға әлеуметтік көмек көрсетіледі. Әкімдіктегілер бұл мәселені бақылап отыр. Мен біздің тараптың атынан он күннің ішінде тергеу жұмыстарының жүргізілетінін және оның нәтижелерін ресми түрде хабарлайтынымызға уәде беремін”, – деді Жеңіс Қасымбек үкімет отырысынан кейінгі брифингте.
Еске сала кетейік, 10 қарашада Қарағандыдағы “Саран” шахтасында төтенше жағдай болған еді. Үш адам қаза тауып, бес адам зардап шекті. Алдын ала мәліметтер бойынша, апат шахтада адамдарды тасуға арналған аспалы жолдың үзіліп кетуіне байланысты болуы мүмкін. Ал кейінірек төтенше жағдайдан ауруханаға түскен төртінші шахтердің көз жұмғаны хабарланған болатын.