Бүгінде Жамбыл облысында 43 546 мүгедек тұрады. Олардың 5 мың 536 – балалар, деп мәлімдеді өңірлік орталық коммуникациялар қызметінің брифингінде Жамбыл облысы әкімдігінің Еңбекпен қамтуды үйлестіру және әлеуметтік бағдарламалар басқармасының басшысы Жорабек Баубеков, деп жазады ҚазАқпарат.
«ҚР Мүмкіндігі шектеулі жандарды әлеуметтік қорғау туралы» ҚР заңындағы талаптарды орындау үшін республикалық, облыстық және жергілікті бюджеттен 1,2 млрд. теңге бөлінді. Бұл қаражаттың көмегімен 12 579 адамға қолдау көрсету көзделген. Соның ішінде 9 334 әлеуметтік қолдау көрсетілді. Бұл сурдо-тифло және протезді-ортопедиялық, гигиеналық құралдар, арбалар, санаторлық-курорттың емделу, жеке көмекші мен ым-ишарат тілі маманының қызметтері, арнайы әлеуметтік қызметтер»,-деді Баубеков.
Спикер тәуелсіздік жылдары өңірде арнайы әлеуметтік қызмет көрсететін ұйымдар желісі кеңейгенін атап өтті. Стационарлық типтегі 2 мекеме, 5 жартылай стационарлық мекеме, 2 уақытша жату мекемесі, үйде қызмет көрсететін 19 бөлімше ашылды. Бөлімшелерде жыл сайын 3,5 мың адамға қолдау көрсетілді.
Ж. Баубеков соңғы жылдары мемлекетік және үкіметтік емес секторлар мүгедектердің өмірін жақсарту мәселесі бойынша ынтымақтастықты нығайтқанын айтты. 2011 жылдан бюджеттен бөлінген 340,2 млн. теңге арнайы жобалар аясында 5 334 арнайы әлеуметтік қызметпен қамтылды.
«2013 жылдан бері облыс бойынша бейімделуі тиіс 904 нысанға паспорт жасалды, ал жергілікті бюджеттен бөлінген 176,3 млн. теңгеге 524 нысанды бейімдеу бойынша жұмыстар жүргізілді», – деді спикер.
Статистикалық мәліметтерге қарағанда, бүгінде Жамбыл облысы тұрғындарының саны 1,111 млн. адамға жетті.