Зейнетақы қорындағы 15 млрд теңге EXPO-ға жұмсалатын болды

70 просмотров

«Бірыңғай жинақтаушы зейнетақы қорынан» тартылған 15 млрд теңгені «Қазақстанның даму банкі»  EXPO-2017 көрмесі аумағындағы нысандар құрылысына жұмсайды.

Бұл туралы «Интерфакс» агенттігіне сілтеме жасай отырып, Астана телеарнасы хабарлады.

Алдын ала таратылған ақпаратқа сүйенсек, Қазақстанның даму банкі КАSЕ қорына облигациялар орналастыру арқылы шілде-тамыз айларында Біртұтас жинақтаушы зейнетақы қорынан 117,5 млрд теңге алды. Оның 15 миллиарды Астанада  EXPO-2017 нысандары құрылысына, 17,5 млрд теңге отандық өндірісті «Қазақстан даму банкі-Лизинг» АҚ арқылы лизингтік қаржыландыруға жұмсалады.

Қалған қаржы 2016-2017 жылдары экономикалық өсімді ынталандыру мен халықты жұмыспен қамту жөніндегі іс-шаралар жоспарын іске асыруға жеке кәсіпкерлік нысандарын қаржыландыруға жұмсалмақ.

Ал «Астана-EXPO-2017 компаниясының өкілі зейнетақы қорының қаржысы тартылатын нысандар көрме павильондарына жұмсалмайды»,- дейді. Сондай-ақ бұл нысандар 174 гектар аумақтың небәрі 25 гектарын ғана алып жатыр екен. Яғни қаржы халықаралық көрме кешені аумағындағы өзге ғимараттар құрылысына жұмсалмақ.

Сергей Куянов, EXPO-2017 ұлттық компаниясының бұқарамен байланыс департаментінің директоры:

— Бұл тұрғын үйлер — «Мега» сауда ойын-сауық орталығы және басқа да бірқатар нысандар.  EXPO көрмесі аумағында орналасқанымен, олар инвестициялық нысандар болып табылады. Біздің компанияға қатысы жоқ. Бұл ақшаны компанияға инвесторлар салды.

Загрузка...