Түркия түрмелеріне тұтқын симай жатыр

50 просмотров

Түркияда іске аспай қалған төңкеріс әрекеті Анкара мен Батыстың арасын аша түсті. НАТО-ға мүше елмен қатынастың шиеленісуі Таяу Шығыстағы аймақтық қауіпсіздікке, Сириядағы дағдарысқа, геосаяси тепе-теңдікке салқынын тигізеді.

Бұл туралы Азаттық хабарлайды.

Түркия президенті Режеп Тайып Ердоған шілдедегі мемлекеттік төңкеріс жасау әрекетіне бар кінәні қазір АҚШ-та тұрып жатқан діндар Фетуллах Гүленге артады. Болмай қалған төңкеріс әрекетінің салдары Түркияның басты мемлекеттік институттарына әлі әсер етіп жатыр.

Гүлен қозғалысымен байланысы бар деген күдікпен 80 мыңға жуық адам мемлекеттік мекемелердегі жұмыстарынан шығарылған, соның ішінде білім министрлігінде 45 мың адам қызметтен кеткен. 2015 жылы Түркия бұларға «Гүленшіл террористер ұйымы» (FETO) деп ат қойып, террорлық ұйым қатарына қосқан. Әділет министрі Бекир Боздагтың соңғы мәліметі бойынша, 18 мыңға тарта адам ресми түрде тұтқынға алынған, оның үстіне тағы 6 мың адам әлі қамауда отыр.

Reuters агенттігінің хабарлауынша, Түркияның түрмелері кісіге толып, соттағы істер саны көбейіп кеткен. Биылғы көктемде елде 188 мың адам қамауда жатқан, бұл – түрмелердің қабылдау мүмкіндігінен 8 мыңға көп. Шілдедегі бүліктен соң тағы ондаған мың адам қамалып, абақтылар аузы-мұрнынан шыға толған.

Қамалғандардың 3 мыңы – прокурорлар мен судьялар, яки елдің сот-құқықтық жүйесі қызметкерлерінің 20 пайызы істі болып жатыр, соның кесірінен соттарда әлі қаралмаған істер жиналып қалған. Президент Ердоған мұны тек «мұзтаудың ұшар басы ғана» деп атады, демек күдіктілерді тұтқындау әлі де жалғасуы мүмкін.

Загрузка...