Астанада 1980 жылдан бері психикалық диспансердің есебінде тұрған азаматтың жалған анықтама жасап, қала мектептерінің бірінде тарихтан сабақ беріп жүргені анықталды. Осыған байланысты психикалық сырқаты бар мұғалім қызметінен босатылды.
Бұл туралы Астана қаласы прокуратурасының баспасөз қызметі хабарлады.
«Астана қаласындағы мектептердің бірінде директордың бұйрығымен 2014 жылы 14 қыркүйекте А. деген азамат тарих және жалпы пәндер оқытушысы ретінде жұмысқа қабылданғаны анықталды . Ол жұмысқа орналасатын кезде ҚР Еңбек кодексінің 32-бабы 1-тармағының 5-тармақшасы талаптарына сәйкес медициналық анықтама ұсынған, оған сәйкес психикалық жағынан дені сау болған. Алайда, тексеру кезінде оның 1980 жылдан бері елорданың медициналық мекемесінде есепте тұратыны анықталды» деп хабарлайды қалалық прокуратураның баспасөз қызметі.
«Осыған байланысты қала прокуратурасы Астана қаласының білім басқармасының атына мектеп директорының А. деген азаматты оқытушы ретінде қабылдау туралы бұйрығының күшін жою туралы наразылық білдірді. Прокурорлық қадағалау актісін қарау нәтижесі бойынша А. деген азамат қызметінен босатылды»,-деп хабарлайды дереккөз.
Бұл адамның жалған анықтама жасатуына қатысты мәселені қарау үшін прокуратура істі Астана қаласының ішкі істер департаментіне жолдады.