Алматы жанындағы “Асыл Арман” тұрғын үй кешенінде 17 жастағы балдызын зорлап, тұншықтырып өлтірген күдікті ұсталды. Ол өз қылмысының жаға ұстатарлық мән-жайын айтып берді, деп хабарлайды Patrul.kz.
Ауыр қылмыс 31 наурызда жасалған. Тұрақты жұмысы жоқ 35 жастағы Дәурен ішімдікке тым әуес болған екен. Сол үшін әйелі балаларын алып Ұзынағаштағы туысқандарына кетіп қалыпты. Бірақ ол 31 наурыз күні жұмысқа шығуға мәжбүр болып, балаларын 17 жастағы сіңлісі Әйгеріммен бірге күйеуі жатқан пәтерге жібереді.
“Тағы ішіп алдым. Сосын қызға тиісе бастадым. Оны зорлап, сосын бірден қылқындырып өлтірдім. Шамамен түс кезі болатын. Қыздың тек төменгі жағын шешіндірдім. Жоғары жағына тиіскен жоқпын. Өлтіргеннен кейін оны киіндіріп, төсектің астына тықтым. Сол кезде үйге балалар кірді. Олар су ішті, мен оларға нан үзіп бердім де қайтадан далаға шығарып жібердім. Тағы ішіп алдым. Балконда палас жатқан, соны шығарып, қыздың денесін орап тастадым. Екі жағынан скотч тартып тастадым да, диванның астына қойып қойдым“, – дейді ұсталған күдікті.
Не бүлдіргенін түсінген кезде жауапкершіліктен қорқып, қашуға бекінген. Балаларды үйге шақырып, ұйықтатып тастаған. Сосын үйдегі бар ақшаны алып, қашып кеткен.
Ал Әйгерімді таппай қалған туыстары полицияға хабар береді. Полицейлер диван астынан кәмелетке толмаған Әйгерім Қожахметованың мәйітін тауып, сәуірдің 1-і күні ШҚО-ның Жарма ауданында бой тасалап жүрген күдіктіні құрықтады. Сол күні-ақ күдікті Алматы облысы Қарасай ауданының Ішкі істер басқармасына жеткізілді.
“Үйде ешкімнің жоғын пайдаланған ол масаң күйде Әйгерімді күштеп зорлаған. Ал Әйгерім болған жағдайды әке-шешесіне айтамын дегенде, оны өлтіруді ұйғарған“, – дейді Қарасай аудандық Ішкі істер басқармасының тергеушісі Әлихан Құлбаев.
Дәурен мас болса да, жасаған қылмысы бүге-шүгесіне дейін есінде екен. Пәтерден қашып шықпас бұрын Әйгерімнің туыстары келіп тұрмасын деген күдікпен подъездің сыртқы есігіне құлағын түріп, тың тыңдапты. Бұл сәттер подъездегі камераға түсіп қалған.