Жалған қызметкерді тіркеп, жалақысын алып келген
Павлодарда колледж директоры жұмысқа жалған қызметкерлерді тіркеп, олардың жалақысын өзі алып отырған. №2 қалалық соты Б.-ға қатысты сеніп тапсырылған мүлікті аса ірі мөлшерде иемденіп алу фактісі бойынша қылмыстық істі қарады. Ол бұл лауазымда он жыл қызмет атқарған.
«2013-2023 жылдар аралығында Түсті металлургия жоғары колледжінің басшысы болған Б. бюджет қаражатын жымқыру мақсатында жалған қызметкерлер туралы әдейі бұрмаланған мәліметтері бар жұмыс уақытын есепке алу парақтарына қол қойған. Соның салдарынан мемлекетке жалпы сомасы 130 миллион теңгеден астам материалдық шығын келтірілген», – дейді соттың баспасөз орталығында.
Прокурор мен жәбірленушінің өкілі Б.-ға 8 жыл мерзімге бас бостандығынан айыру түріндегі жаза тағайындауды сұрады. Сотталушы Б., өз кінәсін ішінара мойындады. Ол және оның қорғаушылары жеңіл жаза тағайындауды сұрады.
«Осыны, сондай-ақ кінәсін ішінара мойындауын, жағымды мінезделуін және асырауында екі жас баланың болуын ескере отырып, сот Б.-ға банк шотындағы ақшалай қаражатын тәркілеумен 7 жылға бас бостандығынан айыру жазасын тағайындады», – деді ведомствода.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе