ҚР Ұлттық банктің төрағасы Данияр Ақышев ұлттық валютаның әлсіреуіне қатысты пікір білдірді.
Бұл туралы Tengrinews.kz хабарлады.
“БАҚ-тар мен әлеуметтік желілерде теңгенің құнсыздануы мүмкін екені жайлы қауесеттердің салдарынан теңге тамыз айының басынан бері құбылмалы болды.
Ал расында айтарлықтай өзгерістер болған жоқ, ұлттық валюта бағамы ауытқыған жоқ. Қазіргі уақытта валюта нарығындағы жағдай тұрақталды. 22-тамыздағы жағдай бойынша ұлттық валюта бағамы жыл басынан бері 0,2 теңгеге нығайып, 333,8 теңге болды. Бүгін биржа 333 теңгемен аяқталды”, – деді Ақышев.
Қазіргі уақытта ақша айырбастау орындары 1 АҚШ долларын 333,7 теңгеге сатып жатыр.
Еске сала кетейік, осыған дейін Ұлттық банк төрағасы Данияр Ақышев Нұрсұлтан Назарбаевқа валюта және қаржы нарығындағы қазіргі ахуал туралы баяндаған болатын. “Жалпы, ахуал тұрақты. Қазір тамыз айының басында ішкі және сыртқы сипаттағы жекелеген факторлар әсерінен болған ауытқулардан кейін айырбас бағамы тұрақтанды. Алаңдауға еш негіз жоқ”, – деген еді Ұлттық банк төрағасы.