Үкімет Бурабайды дамытуға 137,2 млрд теңге бөлмек

Қатаркөл көлінің маңында балалар орталықтары, спорттық-сауықтыру кешендері мен жыл бойы жұмыс істейтін аквапарк салынады. Жүкей көлінің жанында кемпингтер мен глемпингтер ашылса, Кіші Шабақты көлінде жалға беру стансалары, қайық тұрағы, жағалау инфрақұрылымы мен жағажайлар қарастырылған.

Қысқы демалысты дамытуға ерекше көңіл бөлініп отыр. Туристерге ыңғайлы болу үшін шаңғы базасы, жабдықтарды жалға беру орындары, тамақтану нүктелері мен кәдесый дүкендері ашылады. Сонымен қатар, көлік инфрақұрылымы жақсартылып, көпдеңгейлі тұрақтар мен визит-орталықтар салынады.

Бұл бастама туристер санын 35 мыңнан 94 мың адамға дейін арттырып, туризм саласындағы жұмыспен қамтылғандар санын 22 мыңнан 32,5 мың адамға дейін көбейтеді деп күтілуде. Сондай-ақ 22,7 млрд теңге жеке инвестиция тартылып, өңір экономикасындағы туризм үлесі 1,4%-дан 3,5%-ға дейін ұлғаюы тиіс.