Үйінен басқа еркектің киімін тауып алған азамат әйеліне айқай салды

Үйде алаңсыз отыр едім, құрбымның күйеуі телефон шалды. Алсам, ашулы. “Мақсат бар ма? Шақыр” дейді. Мен “ол жоқ” дедім.Сөйтсем, “Күйеуіңе неге ие болмайсың? Тездетіп жет” деп зіркілдейді. Шошығанымнан ішіп отырған шайымды тастай сала, екі аттап жеттім. Барсам, құрбым жылап отыр, күйеуі түтігіп кеткен. Қолында менің күйеуімнің шалбары. Түкке түсінбей абдырап тұрып қалдым. Ол “міне, сенің Мақсатыңның істеп жүргенін қара” деп, маған шалбарды көрсетті. Шалбарға қарап, күлкіден өлдім. “Мына қатын жынды болып қалыпты. Неменеңе жетісіп мəз боласың?” деп одан əрі ашуланды.