Түркияда далада қалған қазақстандық туристерге қатысты министрлік түсінік берді
Түркияға демалуға барған қазақстандықтар қонақүйге жайғаса алмай, далада қалды. Себебі олар брондаған туристік оператор банкротқа ұшыраған болып шықты.
Бұл мәселеге қатысты ҚР Мәдениет және спорт министрлігі Туризм комитетінің төрағасы Манюра Мурзамадиева түсінік берді, деп хабарлайды ҚазАқпарат.
«Жағдайды анықтау үшін шаралар кешенін жүргізіп жатырмыз және Анталиядағы консулдықпен тығыз байланыстымыз. Бұл ретте Түркиядағы туристік оператор кінәлі. «Элит класс» банкротқа ұшыраған, сол себепті өз міндеттерін орындамаған. Қазақстандық компаниялар келісімшарт жасаған түркиялық серіктестердің жауапсыздығынан Түркияға демалуға кеткен туристер қолайсыз жағдайға тап болды.
Аталған жағдайға байланысты, қазақстандық туристерден ұшу алдында қонақ үй мен билеттер үшін ақы төленгенін тексеруді сұраймыз.
Бұл Қазақстанның емес, Түркияның туристік операторларының кінәсі», – деп жауап берді Комитет төрағасы.
Айта кетейік, «ELITE CLASS» туристік фирмасының банкротқа ұшырауынан Түркияда 30 қазақстандық қонақ үйге жайғаса алмаған. Ірі туристік операторлардың бірі бүгін Түркия уақытымен 14:00-де банкротқа ұшырағандарын жариялады. Қолайсыз жағдайға тап болған қазақстандықтарға Анталиядағы Қазақстан консулдығының қызметкерлері көмектесіп жатыр.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе