Шығыс Қазақстан облысындағы су тасқынынан зардап шеккен елді-мекен тұрғындарын қолдау мақсатында Батыс Қазақстан облысы әкімдігі мен өзге де мемлекеттік қызметкерлер бір күндік жалақыларын аударатын болды.
Бұл туралы БҚО әкімдігінің баспасөз қызметі хабарлады.
Бүгінде Шығыс Қазақстан облысының Аягөз, Глубокое аудандарының кейбір елді-мекендерін су басып, Семей қаласында Ертіс өзенінің деңгейінің көтерілуіне байланысты қауіп сейілмей тұр.
“Мұндай жағдайды батысқазақстандықтар 2011 жылы бастан өткізген еді. Көмектен кенде болмадық. Биыл да қауіптің бар екені ескертілді.
Облыс әкімі Алтай Көлгінов 25-наурызда штабтың шұғыл жиынын өткізіп, күшейтілген режимдегі жұмысқа көшкенін мәлімдеген болатын”, – делінген хабарламада.