Қорғаныс және аэроғарыш өнеркәсібі министрі Бейбіт Атамқұлов зымыран ұшыру кезінде болған апаттан кейін алынған экологиялық сынамалардың нәтижесі қалыпты деңгейде екенін мәлімдеді.
Бұл туралы Tengrinews.kz РИА Новостиге сілтеме жасап хабарлады.
Еске сала кетейік, 11-қазанда Байқоңырда “Союз МС-10” зымыран-тасығышын ұшыру кезінде төтенше жағдай болған еді. “Союз МС-10” бортында ресейлік ғарышкер Алексей Овчинин мен америкалық астронавт Ник Хейг болған. Кейінірек олар аман-есен екені анықталған болатын.
“Экологиялық сынамалар қалыпты жағдайды көрсетті. Сараптамалар аяқталып қалды”, – деді Атамқұлов журналистерге.
Оның айтуынша, бүгінде айтарлықтай экологиялық ластану жоқ.
“Бірінші кезекте апат “Байқоңырда” болған жоқ. Бұл ұшыру кезіндегі штаттан тыс жағдай. Ғарыш айлағы өз орнында қаз-қалпында тұр. Онда барлығы тұрақты өтті, барлығы дұрыс. Бұл экологияға еш қауіп төндірмейді. Табиғатқа зияны жоқ”, – деген еді осыған дейін министрліктің баспасөз қызметіндегілер.