Астананың №2 Есіл аудандық соты мәдениет министрі Арыстанбек Мұхамедиұлының актриса Еңлік Сыдықованың үстінен жазған шағымын қарастырмай тастады.
Бұл туралы «KazINFO Today» хабарлайды.
“Мұхамедиұлының Сыдықованың үстінен қылмыстық іс қозғау туралы арыз- шағымын қабылдамаймыз, кері қайтарамыз” делінген қаулыда.
Соттың шағымды қараудан бас тартуына министрдің арызды жеткілікті деңгейде толықтырмағаны себеп болған.
“Айыптаушы (Мұхамедиұлы) айыпталушыны Қылмыстық Кодекстің нақты қандай баптары және бөлімдері бойынша қылмыстық жауапкершілікке тарту керектігін атап көрсетпеген. Сосын Антикоррупциялық қызмет қазір жоғарыда көрсетілген жайттар бойынша сот алды тергеу жұмыстарын жүргізіп жатыр. Оған қатысты шешім әлі қабылданған жоқ” делінген қаулыда.
Айта кетсек, бұдан бұрын министр Мұхамедиұлы соттан бір кездері өзінің қол астында оқыған Еңлік Сыдықованы қылмыстық жауапкершілікке тарту туралы сұраған болатын. Сыдықова өз кезегінде министрді “жыныстық әлімжеттік көрсетті” деп айыптаған еді.
Ал Жемқорлыққа қарсы ұлттық бюро әзіргі күні Еңлік Сыдықованың видеоүндеуінде министрге қатысты айтылған айыптарды тергеп-тексеру үстінде.