Бүгін Орталық коммуникациялар қызметінде өткен брифинг барысында Солтүстік Қазақстан облысының әкімі Құмар Ақсақалов өңірдегі сәулет-құрылыс басқарма басшысының парамен ұсталуына қатысты түсініктеме берді.
Бұл туралы Baq.kz хабарлады.
«Өкінішке қарай, осындай оқиға болғаны рас. Мемлекеттік сәулет-құрылыс бақылауының басшысы бұған дейін қамауға алынған болатын. Бұл сәулет-құрылыс басқармасындағы жемқорлық схемасын көрсетеді», – деді облыс әкімі.
«Ең алдымен, осындай фактілерді болдырмау үшін мемлекеттік қызметтің барлығын автоматтандыру керек. Адамдармен байланысты барынша азайтқан жөн. Рұқсат қағазын беретін жерде жемқорлық болады. Оған тосқауыл қою үшін не істеу керек? Адам құжат тапсырды ма, барлығы дұрыс, түгел болса, онда рұқсатты автоматты түрде беру керек. Бүгінгі таңда мемлекеттік қызметтің 44 проценте жуығы автоматтандырылған. Біздің міндетіміз – мұны 100 процентке жеткізіп, адаммен тікелей байланыс болмайтындай ету. Сонда ғана жемқорлық қылмысын азайтамыз», – деді облыс басшысы.
Еске сала кетсек, күні кеше СҚО әкімдігінің мемлекеттік сәулет-құрылыс бақылауы және лицензиялау басқармасының басшысы пара алып жатқан жерінен ұсталғаны белгілі болды.