Жыл сайын әскери жоғары оқу орындарына 1000-ға жуық азамат оқуға түседі. Кадет корпусында және жоғары оқу орындарындағы әскери оқу бөлімшелерінде мамандықтардың тізбесі қайта әзірленді. Бұл туралы ҚР Қорғаныс Министрлігінің баспасөз қызметі таратқан хабарламада айтылады.
Осы жаңа мамандықтар бойынша білім алғандар әскери салада ғана емес, сонымен бірге азаматтық қызметте де жұмыстарын жалғастыра алады.
Оқыту бағдарламасына әскери әдеп, көшбасшылық және әскери істегі басқару стилі сияқты жаңа пәндер енгізілді. Бұл курсанттардың жеке тұлғасын, көшбасшылық қасиеттері мен мінез-құлқын қалыптастыратын факторлар болып табылады. Жыл сайын Қазақстанның әскери жоғары оқу орындарының курсанттары шетелдерде тағылымдамадан өтеді. Тәжірибе жинақтап, өздерінің біліктілігін арттырады.
Қазір оқуға түсу үшін құжаттар қабылдау жүріп жатыр. Ол 2016 жылдың 15 маусымына дейін жалғасады.