Сирияда соңғы 10 күнде 10 аурухананың күл-талқаны шықты

Роберт Мардини, ХҚКК Таяу Шығыс бойынша аймақтық директоры:

– Соңғы екі аптада Сирияда атыс-шабыстан аруханалар, мектептер мен өзге де инфрақұрылым нысандарының қирап жатқаны жайлы жағымсыз жаңалық көбейіп кетті. Бұл бізді алаңдатып отыр. Ең бастысы әскери іс-қимылдарды бейбіт тұрғындардың өміріне қауіп төнбейтіндей етіп жүргізу керек. Сондай-ақ ауруханалар секілді халықтың амандығы үшін қажетті нысандар жайлы да ұмытпаған жөн. Осы ретте жанжалдасушы тараптарды халықаралық гуманитарлық құқықтың негізгі ережелерін сақтауға тағы да шақырамын.

Жалпы, 6 жылдан асқан азамат соғысынан Сирияның денсаулық сақтау саласы қатты зардап шекті. Атыс-шабыстан ауруханалардың біразы қирап қалған. Дәрі-дәрмек те тапшы. Дәрігерлер соның ішінде хирург мамандар жетіспейді. Олардың біразы соғыстан қашып, өзге жаққа бас сауғалаған. Тағы біразы атыс-шабыс кезінде көз жұмды.