Алматыдағы Халыққа қызмет көрсету орталығының бірінен шу шықты. Сөйтсе, ондағылар Сізге ескертпестен, сізге қатысты анықтаманы бөтен біреулерге бере береді екен.
Бұл туралы Алматы тұрғыны Анна Димитриевич Facebook-тегі жеке парақшасында жазды.
«…Білесіздер ме, масқара болғанда, мына Халыққа қызмет көрсету орталықтары біздің жеке мәліметтерімізді таратып жатыр екен. Бүгін Egov-тағы жеке кабинетіме кіріп, шошып кеттім. Сөйтсем, менің атымнан біреу анықтама алыныпты. Мекен-жай туралы және жылжымайтын мүлікке қатысты анықтама. Өз көзіме өзім сенбей, ойланып қалдым. Мүмкін, алдым ба деймін ғой. Есептесем, анықтама сәрсенбі күні кешке алынған. Ал бұл күні мен таңертеңнен қара кешке дейін сабақтамын ғой, олай болуы мүмкін емес. Одан соң, маған анықтама керек те болған жоқ. Оны қайтем?.. Содан жанұшырып, Алматы қаласындағы «Азаматтарға арналған үкімет» департаментіне бардым. Арыз жаздым.
Қызметкер көрсетілген электронды мекен-жай бойынша кімнің кіргенін тексерді. Ақырында, анықтаманың Алмалы ауданында бергені анықталды.
Әлгі қызметкер маған қарап, жеке куәлігім мен пастортымды ауыстыруға кеңес берді. Аузым ашылып қалған, түк ұқсам бұйырмасын.
Содан не керек, анықтаманы берген Алмалы ауданындағы Халыққы қызмет көрсету орталығына бардым. ол арадағы басшының орынбасары қызметкерін тауып, жағдайды тексерттім. Анықтама берген қызметкер мені мен менің тағы бір танысым туралы ақпаратты Бердинов Серік есімді «Forte Bank» қызметкеріне беріпті. Қалай сонда? Ешкім ешнәрсе түсіндіре алмады. Бір анығы, “ЦОН”-ның қызметкерлері лауазымын асыра пайдаланып, жеке адамдардың мәліметін біреулерге тарата береді.
Бұл өзі қалыпты, жылдар бойына әдетке айналған нәрсе сияқты. Департамент те бұл жайттан хабардар секілді.
Бір уақытта тағы бір қызметкер келіп, менімен “Forte Bank” қызметкері сөйлескісі келетінін айтты. Тұтқаны алғанда, ол менің несие алған-алмағанымды сұрады. Мен ешқашан несие алмағанымды айттым. Ол сандардан шатасқан болар деген болжам айтты. Әрі қарай тыңдағым келмеді…
Осыдан соң, бір сағат күткеннен кейін, банк қызметкері келді. «Глобал Капитал» ЖШС өкілі (өзін осылай таныстырды) келіп, менің банктерге келісім берген-бермегенімді сұрады. Айтуынша, банкке келісім берген болсам, олар мен жайлы анықтама ала алады екен. Мен ондай келісім бермегенмін. Бұның не қатысы бар десем…
Әбден абыржыған “ЦОН” қызметкерінің бірі, анықтамалардың осы «Глобал Капитал» ЖШС арқылы берілетінін айтып қалды. Міне, керек болса саған!
Демек, “ЦОН”-ның кей қызметкерлері жекеменшік ЖШС мен банктермен ауыз жаласады. Ал, біз мұнда жемқорлық жоқ деп ойлаймыз. Бұлай жалғаса берсе, не боларын елестете беріңіз.
Осы кезде Олег Чернов келіп жағдайдың тексерілетінін, шара қолданатынын айтты. ЖШС қызметкері менің телефон нөмірімді алып қалды, ал екіншісі, мәселені «өз арамызда» шешейік деп сыбырлады. Жарайды, менімен шешілер. Ал, басқа мыңдаған адамды қайтеміз сонда? Олардың барлығы алаяқтарға құрбандыққа шалына бере ме осылай?» – деп жазды Анна Димитриевич.
Ал “Азаматтарға арналған үкімет мемлекеттік корпорациясының” баспасөз қызметі басқарма төрағасы Абылайхан Оспанов желіде жазба қалдырып, аталған істің тексерілетінін, кінәлілердің міндетті түрде жауапқа тартылатынын айтты.