Сонымен биылғы жылғы «Қазақстандағы ғарыш күндері» дәстүрлі халықаралық форумы Қазақстан Республикасы Қорғаныс және аэроғарыш өнеркәсібі министрлігі (ҚАӨМ) алғаш рет өткізіп отырған «KADEX-18» көрмесі алаңында ұйымдастырылды.
Осынау шараған барлығы 20-дан астам мемлекеттің ( соның ішінде – Франция, Америка Құрама Штаттары, Жапония, Италия, Ресей, Ұлыбритания, Сауд Арабиясы, Беларусь, Украина, Қытай, БАӘ, Корея және тағы да басқалар) ғарыштық ведомстволар мен мемлекеттік органдардың мамандары, танымал ғарышкерлер, атақты ғалымдар, сонымен бірге ғарыштық технологиялар саласындағы жетекші әлемдік компаниялардың өкілдері еліміздегі ғарыш форумына қатысу үшін келді.
Мінекей, осынау шарада сөз сөйлеген әйгілі ғарыш саласының маманы, қазіргі таңда Украинаның ұлттық ғарыш агенттігін басқарып отырған (УҰҒА) Павел Дегтяренко мырза Қазақстанның ғарыш саласындағы жеткен жетістіктері еліміздің ғарыш саласын дамытуға барынша көңіл бөлетін Қазақстан Президенті Нұрсұлтан Назарбаевтың есімімен тікелей байланысты екендігін тілге тиек етті.
«Меніңше, Қазақстанда ғарыш құрылғыларының белгілі бір дәрежеде аз болуы еш қиындық тудырмайды деп санаймын. Қазіргі таңда ғарыш құрылғыларының (SBIC SC) жинақтық сынақ орталығы, ғарыш техникаларының нақтыланған арнайы құрылымдық технологиялық бюросы құрылып жатыр. Сонымен бірге Ұлттық ғарыш орталығының құрылысы жүргізілуде екен. Ең бастысы – осы саланы дамытудың тиімді тәсіл анықталды, Қазақстанда бірте-бірте ғарыш инфрақұрылымының іргетасы қалануда», – деді өз сөзінде УҰҒА басшысы.
Өз кезегінде Қазақстандағы ғарыш мамандарымен тығыз байланыс орнатқан «Энергия» зымыран-ғарыш корпорациясы басқарылатын ғарыш кешендерінің бас құрылымдаушысы – Бас құрылымдаушының бірінші орынбасары Сергей Романов және «Байқоңыр» ғарыш айлағындағы «Энергия» зымыран-ғарыш корпорациясы өкілдігінің директоры генерал-лейтенант Леонид Баранов Елордадағы Ұлттық ғарыш орталығында болды.
Шара барысында танымал Airbus Defence және Space еуропалық концернінің Франциядағы бөлімшесінің аға вице-президенті Хьюг Лаппорт-Вейвад еліміздегі ғарыш саласын дамытуға қосқан үлесі үшін Қазғарыштың 25 жылдық мерейтойына орай мерекелік арнайы медальды мойнына тақты.
Хьюг Лаппорт-Вейвад өз сөзінде еліміздегі және жалпы әлемдегі ғарыштық қызмет көрсетудің ең озық деген техникалық үлгілерін пайдалана отырып, KADEX-2018 халықаралық көрмесі аясында ұйымдастырылған осынау форумның жоғары деңгейде ұйымдастырылғанын атап өтті.
«Осы уақыт аралығында ғарыш саласындағы келешектегі ұжымдасып, бірлескен бағдарламалар бойынша Қазақстандағы ғарыш саласындағы әріптестерімізбен көптеген маңызды кездесулер, келіссөздер өткіздік. Шара барысында Airbus Defence and Space «Қазақстан Ғарыш Сапары» ҰК» АҚ-мен KazEOSat-1, KazEOSat-2 жер серіктеріндегі кескіндерді халықаралық таратуға қосымша келісім жасалғаны біз үшін үлкен жетістік», – деді өз сөзінде франциялық компанияның жетекшісі. Сондай-ақ, Хьюг Лаппорт-Вейвад осы марапатқа ие болу ол үшін үлкен марапат екендігін атап өтті.
Ал Thales Alenia Space франциялық компаниясы Италиядағы бөлімшесінің вице-президенті Джузеппе Матараццо өзінің презентациясында кәсіпорнының табысы туралы айтты.
Матараццо KazSa жобасында Қазақстанмен табысты көпжылдық ынтымақтастықты атап өтіп, итальялықтардың осы бірлескен жұмысты мақтан тұтатынын тілге тиек етіп, бұл жемісті жұмыстың әрі қарай да жалғасын табарына сенім білдірді.