Семейде 8,5 млн теңге несие тіркетіп, елді алдап кеткен алаяқ ұсталды
Семейде 12 адамның атына жалпы сомасы 8,5 млн теңгеге тауарлық несие алдырған алаяқ азамат ұсталды.
Бұл туралы ҚазАқпарат хабарлады.
Семейде алаяқ тұрғындарға миллиондап несие алғызған. Қазір 37 жастағы азаматтың үстінен аса ірі көлемде алаяқтық әрекеттер жасау дерегі бойынша қозғалған қылмыстық іс сотқа жіберілді.
Азамат 12 адамның сеніміне кіріп, алдау арқылы екінші деңгейлі банктерден несиеге түрлі тұрмыстық техникалар рәсімдеуге көндірген.
Ал ай сайынғы төлемақыны өзі төлеуге уәде берген. Және ол тауарды алып бергені үшін тұрмыстық техниканың бағасына байланысты 5-тен 10 процентіне дейін мөлшерін несие рәсімдеушіге беріп отырған.
Тексеру кезінде азаматтың тауарларды нарық бағасынан төмен бағада қайта сатып отырғаны белгілі болды. Ал тұрғындарға әкелген шығын көлемі 8,5 млн теңге.
«Семей қалалық ІІБ-на қала тұрғыны келіп, танысының екі жыл бойы несиесін төлемей жүргенін айтып арызданды. Полиция қызметкерлерінің жүргізген жедел іздестіру шаралары кезінде 37 жасар азамат ұсталды. Ол қаладағы әртүрлі сауда үйлерінен өз таныстарына тауарларды несиеге алғызған. Қазір «Алаяқтық» бабы бойынша қылмыстық іс аяқталып, сотқа жөнелтілді»,-деді Семей қалалық ІІБ Мемлекеттік тіл және ақпарат бөлімінің жетекшісі Елубек Оспанов.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе