«Сарқандта кісі өлтіргіш жүр» деген ақпараттың анық-қанығы мәлім болды

Алматы облысында «WhatsApp» арқылы жалған ақпарат таратқан әйел ұсталды.

Ұсталған 28-жастағы Сарқан ауданының тұрғыны мұны күйеуінен естіп, елді сақтандырып қоймақ болдым деп ақталған. Бұл туралы облыстық ішкі істер департаментінің баспасөз қызметі хабарлады.

Ол 10-шы қаңтар күні «WhatsApp» желісі арқылы:

«Сарқан қаласында кісі өлтіргіш пайда болды. Полицейлер барынша сақ болып, үйден шықпай, есікті жауып отыруды ескертті.

Кеше өзеннің жанында әйел мен ер адамды, балаларды да өлтіріп кеткен. Бізге осы жайлы ескертіп және таныстарымызға да айтуды тапсырды»

деген ақпарат таратқан.

Тексеру кезінде ақпаратттың жалған екені анықталды.

«Жедел-іздестіру кезінде жазбаның авторы Сарқан ауданының 28-жастағы тұрғыны екені анықталды. Әйел бұл жалған ақпаратты «WhatsApp» арқылы таратқанын мойындады. Бірақ оған бұл жайлы күйеуі ауызша айтқанын айтып ақталды. Ал жолдасы болса адамдарды аяусыз өлтіріп жатыр деген әңгімені дүкенде тұрып естіп қалған екен. Бір сөзбен айтқанда, бұл ешқандай негізі жоқ даурықпа өсек боп шықты», — деп мәлім етті облыстық ІІД баспасөз қызметі.

Қазір шындыққа жанаспайтын қауесетпен тұрғындарды дүрліктірген күдікті әйелдің үстінен қылмыстық іс қозғалды. Тергеу ҚР Қылмыстық кодексінің 274-бабына сәйкес жүргізіліп жатыр. Ал 28 жастағы жергілікті тұрғынға бұлтартпау шарасы қолданылып, қолхатпен жіберілді.