Ресейдің сыртқы істер министрі Сергей Лавров АҚШ мемлекеттік хатшысы Рекс Тиллерсонмен телефон арқылы сөйлесіп, Құрама Штаттарды Солтүстік Кореяға қарсы әскери қимылдар жасамауға шақырды. Бұл туралы Ресейдің сыртқы істер министрлігі 30 тамызда хабарлады.
АҚШ президенті Дональд Трамп Солтүстік Кореяның зымыран сынақтарына қатысты жауап берудің “түрлі әдістерін” қарастырып жатқанын бірнеше мәрте мәлімдеді. Сәрсенбі күні Трамп Twitter’дeгі шағын блогында осы мәселеге қатысты “құр сөз – жауап емес” деп қысқа қайырған.
Жапония әлемдік қауымдастықты Пхеньянға қарсы жаңа санкциялар енгізуге шақырып отыр. Солтүстік Кореяның осы аптада ұшырған зымыраны жапондық Хоккайдо аралының үстінен өтіп, Тынық мұхитына құлаған.
Биыл жазда Пхеньян баллистикалық зымырандарын сынақтан өткізген соң, БҰҰ Қауіпсіздік кеңесі Солтүстік Кореяға қарсы жаңа экономикалық санкциялар салуды қолдады. Сейсенбі күні, 29 тамызда Қауіпсіздік кеңесі Пхеньянның жаңа баллистикалық зымыран ұшырғанын қатаң сынағанымен, оған қарсы ешқандай әрекет жасаған жоқ.