Өзбекстан президенті Шавкат Мирзиёевті инаугурациялау салтанаты бүгін Ташкентте парламенттің бірлескен отырысы аясында болып өтті. Бұл туралы жергілікті БАҚ хабарлады.
Президентті ұлықтау рәсіміне Орталық сайлау комиссиясы мен үкімет мүшелері, Конституциялық соттың судьялары, Ташкентте тіркелген дипломатиялық мекемелердің басшылары, БАҚ өкілдері қатысты.
Одан соң мемлекет басшысы Конституция мен Құранға қолын қойып, ант қабылдады: “Өзбекстан халқына қызмет етуге салтанатты түрде ант етемін”.
Ант қабылдаған соң Мирзиёев баяндама жасады.
4 желтоқсандағы президенттік сайлауға Мирзиёев Өзбекстанның либерал-демократиялық партиясы атынан қатысып, 88,61 пайыз дауыс жинады. Өзбекстанда кезектен тыс сайлау республиканың тұңғыш президенті Ислам Кәрімовтің 2 қыркүйекте инсульттан соң 79 жасында қайтыс болуынан соң ұйымдастырылды.