Мәскеу полициясы Өзбекстан азаматшасы Нилуфар Мамасаидоваға бір жастағы қызын қайтарып берді. Құқыққорғау қызметкерлері баланы өткен жылы 26 желтоқсанда анасының құжаттары жоқтығына байланысты алып кеткен еді.
Адвокат әрі адам құқығын қорғаушы Бахром Исмаиловтың айтуынша, Мамасаидованың өзін сотқа жеткізді. Оған көші-қон заңдарын бұзды деген айып тағылған.
2015 жылы қазанда Петербургте Тәжікстан азаматшасы Зарина Юнусованы полиция көші-қон заңдарын бұзғаны үшін ұстады. Оның да баласын – 5 жастағы Умарали Назаровты анасынан ажыратты. Келесі күні Юнусова баласын көруге ауруханаға келгенде, дәрігерлер оған Умаралидің қайтыс болғанын хабарлаған. Дәрігерлер баланың өліміне вирустық инфекция және жүрек талмасы себеп болды деп түсіндірген. Умарали Назаровтың өлімінен соң Петербургте бірнеше мәрте наразылық акциясы өткізілді.