Павлодарда жазықсыз сотталып, ақталған жігітке моральдық өтемақы төленді
Заңсыз сотталған Павлодар облысының тұрғыны Қаржы министрлігінен 10 млн теңгені өндіріп алу мақсатында Астана қаласының Сарыарқа аудандық сотына жүгінді.
Бұл туралы ҚР Жоғарығы сотының баспасөз қызметі хабарлады. Сот талап арызды қарай келе, оны қанағаттандырудан бас тартты. Соттың шешімімен келіспеген шағымданушы Жоғары сотқа жүгінген.
«Павлодар облысының Екібастұз қалалық соты М.-ны Қылмыстық кодекстің 108-бабына сәйкес кінәлі деп танып, 53 025 теңге (25 АЕК) көлемінде айыппұл салған. Сот оған ешқайда кетпеу туралы қолхат түріндегі бұлтартпау шарасын қолданған. Алайда Павлодар облыстық соты үкімнің күшін жойып, М.-ны қылмыстық құқық бұзушылықты жасады деп тағылған айып бойынша кінәсіз деп танып, оны ақтады. Сот үкімнің заңды күшіне енбегендігін, орындалуға жіберілмегендігін, сотқа дейінгі тергеу жүргізілмегендігін, бас бостандығын шектеу немесе өзге шаралар қолданылмағандығын алға тартып моральдық өтемақы беруден бас тартқан», делінген хабарламада.
«Апелляциялық сатыдағы сот қана талапкерге қатысты қолданылған ешқайда кетпеу туралы қолхат түріндегі бұлтартпау шарасының күшін жойған. М. үкім шыққан күннен бастап ақталғанға дейін сотталғанның мәртебесінде болды. Осы екі айдың ішінде оның құқықтары шектелді. Қылмыстық қудалау органдарының әрекеттерінің салдарынан талапкердің моральдық зиян шеккендігі туралы уәждері негізді деп танылды», делінген хабарламада.
Жергілікті соттар оңалту қажеттігін көрсетпеген, сәйкесінше оның моральдық зиянды өндіріп алу құқығы жоқ деген негізсіз қорытынды жасаған.
Жоғарғы сот бұрын шыққан актілердің күшін жойып, М-ның талап-арызын ішінара қанағаттандырды. Қаржы министрлігінен талапкердің пайдасына моральдық зиянның өтемақысы ретінде 100 мың теңге өндірілді.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе