Оңтүстіктің жаңа әкімі Шәмші әндері байқауының жеңімпаздарын марапаттады
Оңтүстік Қазақстанда Шәмші Қалдаяқов атындағы «Арыс жағасында» VII ретро-фестивалі барысында «Менің Қазақстаным» VII Халықаралық ән байқауының жеңімпаздары анықталды.
Облыс әкімі Жансейіт Түймебаев жеңімпаздарды марапаттап, сый-сияпаттар табыстады.
Бұл туралы Оңтүстік Қазақстан облысы әкімінің баспасөз қызметі хабарлады.
Жылда өткізілетін Шәмші Қалдаяқов атындағы «Менің Қазақстаным» атты халықаралық ән байқауы биыл да жалғасын тапты. Алайда биылғы байқау алдыңғыларынан өзгерек болды. Оған Қазақстаннан тыс Қырғызстан, Әзірбайжан, Ресей, Қытай және басқа да елдерден 60-қа жуық үміткер қатысты.
І-орынға Оңтүстік Қазақстан облысының намысын қорғаған Диана Хашимжанова ие болса, ІІ-орын алматылық Тілекбай Нағымбаев пен астаналық Еркебұлан Тұрмағамбетовке бұйырды. Ал жүлделі ІІІ орынға астаналық Жалғас Сұлтанов пен Марат Айтымбай және Лаура Айтбаевалар (Қарағанды) лайықты деп танылды.
Сондай-ақ, салтанатты шарада облыс әкімінің арнайы жүлдесімен Қытай Халық Республикасынан келген Асылхан Дәстүр марапатталса, арнайы диплом қырғызстандық Биназира Аблаеваға табысталды.
Халықаралық байқау ҚР Мәдениет және спорт министрлігінің ұйымдастыруымен өтті.
050013, ҚР, Алматы қ., «Керемет» ықшамауданы, 7 үй, 39 корпус, 472 кеңсе